Þá er aldrei kosið aftur

Evrópusamtökin fagna því á bloggsíðu sinni að tillaga um þjóðaratkvæðagreiðslu um veru Bretlands í Evrópusambandinu skyldi vera felld í brezka þinginu síðastliðið mánudagskvöld þrátt fyrir að skoðanakannanir hafi ítrekað sýnt undanfarin ár að mun fleiri Bretar vilji segja skilið við sambandið en vera þar áfram innanborðs og að mikill meirihluti vilji að slíkt þjóðaratkvæði fari fram.

Þá liggur væntanlega fyrir hvernig Evrópusamtökin tækju því ef Ísland gengi í Evrópusambandið og meirihluta þjóðarinnar líkaði síðan ekki vistin þar og vildi út. Nú er ekki beinlínis hlaupið út úr sambandinu en það væri ljóslega ekki einu sinni í boði að mati samtakanna að láta reyna á það og byrja á því að leyfa þjóðinni að segja álit sitt á því hvort það skyldi gert.

Vinnureglan er einu sinni sú að kjósa aftur og aftur um inngöngu í Evrópusambandið í þjóðaratkvæði eða eitthvað samrunaskref innan sambandsins (í þau fáu skipti sem slíkt er leyft). Þegar síðan og ef samþykki næst fram er hins vegar aldrei kosið aftur.

Athugasemdir

[Haraldur Hansson, 27.10.2011 kl. 00:40]

Í fyrirsögn kalla Evrópusamtökin það "and-ESB tillögu" að leggja til lýðræðislega umfjöllum, að ósk meirihluta þjóðarinnar.

Án þess að reyna að gera lítið úr skrifurum Evrópusamtakanna þá leyfi ég mér að halda því fram að þeir komi ekki auga á fáránleikann. Þeir litu í alvöru á það sem sigur að taka af fólki réttinn til að kjósa.

[Gunnar Heiðarsson, 27.10.2011 kl. 08:53]

Noðurstaða atkvæðagreiðslunnar í breska þinginu var fengin fram með hótunum, svona líkt og aðildarumsókn okkar var afgreidd á Alþingi.

Þingmönnum breska íhaldsflokksins var grímulaust og opinberlega hótað því að frami þeirra í pólitík yrði stöðvaður, ef þeir greiddu tillögunni sitt atkvæði. Samt sem áður var ótrúlegur fjöldi þeirra sem hundsuðu fyrirmæli foringjans. Þeir þingmenn töldu sig væntanlega vera bundnari af tryggð við kjósendur sína en flokkinn.

Nokkuð kunnuglegt!